هذا مارأيت فى دبى: شد حيلك

1- وإنت صغير :

شد حيلك عشان تدخل المدرسة

2- وإنت في أخر سنة في الإعدادي :

شد حيلك عشان تدخل ثانوية عامة ، إنت مش بتاع دبلوم ، هتتعب السنادي بس هترتاح بعد كدا وهتبقى عارف إنت رايح فين .

3- وإنت في تانية ثانوي :

شد حيلك عشان تجيب مجموع كويس ، السنة دي هتحدد مستقبلك وتحدد هتروح على فين ، وبعد كدا هترتاح

4- وإنت في ثالثة ثانوي :

شد حيلك عشان تحافظ على المجموع إللي جبته في تانية ثانوي وتدخل كلية محترمة ، وبعد كدا هترتاح في الكلية

5- وإنت في الكلية :

شد حيلك عشان تجيب تقدير تراكمي كويس عشان تعرف تشتغل ، وبعد ما تخلص الكلية وتشتغل هترتاح طول عمرك

6- وإنت في أخر سنة في الكلية :

شد حيلك دي أخر سنة ، لازم تجيب مجموع كويس ، الشركات بتركز على أخر سنة ، وخلاص كدا هترتاح من المذاكرة وتشتغل وتعيش حياتك

7- بعد الكلية :

شد حيلك ودور على شغل ولا هتفضل قاعد عاطل كدا

8- بعد ما تلاقي شغل :

شد حيلك وشوفلك عقد وسافر على برة عشان تعرف تكوّن نفسك

9- بعد ما تسافر :

شد حيلك واعملك قرشين عشان تشوفلك شقة وتوضبها

10- بعد الشقة :

شد حيلك عشان نشوفلك عروسة ونجوزك بقى ، إنت كبرت وكسرت التلاتين

11- بعد الجواز :

شد حيلك وجبلك طفل كدا يملى عليك البيت

12- بعد اول طفل :

شد حيلك عشان تأخيه ، متخليش الواد يكبر لواحده ويحس بالوحدة

13- في الغربة :

الوو ، الحاج ... ، شد حيلك يا حاج ، البقاء لله ، إبنك توفي في حادثة عربية ، إن شاء الله هنحاول نخلص الاجراءات بأسرع وقت عشان الجثمان ينزل البلد بكرة او بعده بالكتير ، ربنا يصبركوا ،

13 مكرر - في الغربة :

الوو ، شد حيلك ، البقاء لله ، ( والدك / والدتك ) تعيش إنت ، مفيش داعي تنزل ، خلاص الدفنة بعد ساعتين ، ربنا يصبرك في غربتك ، إدعيله ربنا يرحمه ، أخر حاجة قالها كان بيسلم عليك

14- بعد الرجوع النهائي من الغربة بعد عمراً طويل :

شد حيلك ، المؤمن مصاب ، الغربة بنت الكلب مبتسبش حد في حاله ، لازم تمرّضه ، إنت أحسن من غيرك ، في ناس جالها فشل الكلوي وناس جالها الضغط والسكر ، وناس امراض مستعصيه ، ربنا يشفيك ، وإنت عملتلك قرشين هينفعوك ومش هتحتاج لحد .

15- وأخيراً

شد حيلكوا و البقاء لله ، الوالد تعب كتير في دنيته وإتغرب عشان يعلمكوا ويأمن مستقبلكوا ، ربنا يرحمه ويصبركوا

كتبها : طارق حسن

www.facebook.com/tarekfalcon

تابعونا على