برنامج إدارة المصروفات - فالكون إكسبنسز | Falcon Expenses Management

Download Falcon Expenses Software 

حمل برنامج المصروفات فالكون إكسبنسز

www.facebook.com/befalcons

نبذة عن برنامج المصاريف وكيفية إستعماله 

-----------------

البداية للي عاوز يعرفها بالتفصيل ، يقدر يقرأ مقال مصاريف المغترب الشهرية || http://on.fb.me/1xI4Fuy

في المقال دا ، تكلمت عن مصاريفي الشهرية وإني في أخر الشهر ، كأي شخص ، بلاقي إني صرفت فلوس كتير ومش فاكر صرفتها فين 

وجت الفكرة في تسجيل كل المصاريف بشكل يومي على برنامج بسيط ، بحيث في أي وقت أقدر اعرف انا صرفت قد ايه ؟

ولما نزلت المقال ، ناس كتير طلبت البرنامج ، ولآن البرنامج كان معمول ليا أنا بس ، فكان لازم أضيف عليه تعديلات عشان يناسب أي شخص يستعمله ، والحمد لله أخيراً ظهر البرنامج بنسخته الجديدة وطبعا مجانية ، عشان تعرفوا إني مش مادي :D 

أي حد يقدر يحمله من هنا | www.facebook.com/befalcons

تعالوا بقى نتكلم عن فوائد البرنامج وطرق الإستفادة منه 

أولا هتكلم عن نفسي ، أنا بستفاد منه في إيه ، بعدين هقولكوا تقدروا تستفادوا منه في إيه .....

انا مبستعملش البرنامج لتسجيل مصروفاتي فقط ، انا بستعمل البرنامج في أكثر من حاجة 

لآن البرنامج بيتيح لك تعمل أكثر من مستخدم وكلمة مرور ، فانا عامل مستخدم للمصاريف الشهرية بسجل فيه كل مصاريفي من الإبرة للصاروخ ، وعامل مستخدم للإيرادات بسجل فيه الدخل زي المرتب  ولو في اي دخل تاني زي حد إشترى مني برنامج او حد عاوز يعمل موقع إلكتروني وي حاجة نادرا لما بتحصل ( بشيل العين :D )

يبقى أنا كدا سجلت إيراداتي ومصروفاتي ، حلو 

نيجي بقى للحاجة الأهم ، أنا كمغترب ، وكأي مغترب بيحول فلوس لأهله كل فترة ، سواء عشان تجهيز الشقة او اشتري حاجة في مصر ( شاري لحد دلوقتي برجين وهرم  :D ) او هدايا او مصاريف  ، 

فعامل مستخدم خاص بالتحويلات ، وكل ما أحول مبلغ أسجله بالتاريخ ومين إللي استلمه في مصر  وقيمة المبلغ بالدرهم وقيمته بالجنية المصري ، يعني لو طلبتوا مني دلوقتي أقولكوا حولت كام لمصر من 2009 لحد دلوقتي ، مش هقولكوا أكيد :D 

طيب دا بالنسبة ليا ، بالنسبة لأي حد تاني يقدر  يستعمل البرنامج في إيه 

1- تسجيل كل المصروفات بشكل يومي 

2- تسجيل كل الإيردات / الدخل كالمرتب / العمولات والذي منه 

3- تسجيل كافة التحويلات لو مغترب مثلا 

4- لو عندك مكتب او شركة صغيرة ، تقدر تسجل كل مصروفات وإيرادات الشركة 

5 - لو بتعمل خير بشكل منتظم ، بتكفل اسر او أيتام ، تقدر تسجل كل دا ، بحيث تعرف إنت بتتبرع قد إيه وبتتبرع فين ، تقدر تسجلها مع المصروفات او في حساب لوحدها 

6- لو عندك كريدت كارد ، ممكن تعمل مستخدم خاص بمصروفاتك من الكريدت كارد عشان تقدر تظبط نفسك ومينزلش عليك فوائد 

7 - لو صحابك مظبطينك وكل شوية يستلفوا منك فلوس ، ممكن تعمل مسستخدم للتسليف عشان تعرف مين استلف منك أمتى والمفروض يرجعهم إمتى 

8 - لو إنت مغترب وبتنزل كل سنة تدور على عروسة ، ممكن تسجل بالتواريخ كل العائلات إللي رحتلهم وسبب الرفض ، عشان تنقهر كل شوية ، وتعرف إنك نحس ومعنس وتنتحر بقى :D 

9- لو إنتي مخطوبة ، ممكن تكتبي كل الهدايا إللي خطيبك بيجبهالك ، بالتاريخ وقيمة الهدية ، عشان لما تتخانقوا سوا ، تطبعيله التقرير وتقوليله في وشة " هدايا إيه يابو هدايا ، دي كلها من العتبة بــ 5 جنية يا معفن ( سوري في اللفظ يعني ) )  

10 - لو إنتي متجوزة ، ممكن تسجلي كل الخروجات مع زوجك ، ومنها هتعرفي أخر خروجة إمتى ، وتيجي تقوليله " حبيبي إحنا مخرجناش من شهر و 6 أيام ، مش هنخرج بقى أنا زهقت " ولو شد معاكي وقالك احنا كل شوية خروجات خروجات ، تروحي مطلعاله التقرير ، وتقولي " لا يا حبيبي ، إحنا مجوزين من 5 سنين ، مخرجناش إلا 30 مرة ، يعني في السنة 6 مرات ، متعملهمش عليا ، دول مكلفوكش غير 1500 جنية ، يعني المرة ب 50 جنية ، وكلة بالمستندات " ، إفحمية ، مع فالكون مفيش مستحيل 

يعني الموضوع مش مختصر بس على مصروفات وفلوس ، لأ ، ممكن تسجل ذكرياتك الحلوة والوحشة بردو :D 

خرجت إمتى ومع مين ويوم إيه وصرفتوا قد إيه  ;)  

طيب هل البرنامج صعب ؟

لا بالعكس ، البرنامج سهل جدا ، كل ما عليك بتنزل البرنامج على جهازك ( حاليا لأجهزة الكمبيوتر بنظام الويندوز فقط ) 

اول مرة بتختار المستخدم الموجود falcon وهو أتوماتيك بيحط الباسورد 

بتلاقي عند 4 إختيارات 

1- المصاريف : ودا لإدخال كل المصاريف بشكل يومي ، ويوجد فيها محرك بحث ، تقدر تبحث عن مصاريف في اي فترة زمنية ، وتقدر تبحث ببند معين ، يعني مثلا لو أختارت بند "البنزين " من اول السنة لأخرها ، تقدر تعرف إنت صرفت قد إيه على بنزين السيارة وهكذا 

2- المستخدمين : ودا بتعرف منه المستخدمين ولكل مستخدم كلمة مرور ، ولما بتفتح البرنامج بتختار المستخدم وادخل كلمة المرور وتبدأ تدخل الحركات الخاصة بيه 

3- البنود العامة : ودي بنود المصروفات اللي بتظهر في كل المستخدمين ، يعني اي بند بتضيفه تحت البنود العامة هتقدر تختاره وإنت بتضيف مصروفات اي مستخدم 

4- بنود المستخدم : ودي بنود بتظهر فقط مع المستخدم الحالي ، يعني لو إنت داخل من مستحدم إسمه Tarek وعرفت مجموعة بنود مستخدم له ، لو دخلت من أي مستخدم تاني مش هتلاقيها 

أتمنى البرنامج يكون مفيد ، ولو حد له اي استفسارات ، أنا موجود 

يمكن تحميل البرنامج من هنا | www.facebook.com/befalcons

بقلم : طارق حسن #فالكون 

www.facebook.com/tarekfalcon