28‏/08‏/2013

إعرف حقك


إعرف حقك 
---------
السنادي ( اول مايو ) ، إنتهى عقد إيجار الشقة إللى انا فيها ، فرحت مكتب الإيجارات عشان أجدد ، مكتب الإيجارات مش هو المالك ، دا مجرد وسيط بيني وبين مالك الشقة وهو مواطن إماراتي ، يعني عشان لو حصل اي مشكلة فى الشقة ، بيتم التواصل مع مكتب الإيجار .
مكتب الإيجار بياخد  من المستأجر ( إللى هو زي حالاتي ) لما ييجي ياخد الشقة عمولة شهر او شهرين على حسب الإتفاق  .
المهم رحت عشان أجدد العقد فى مكتب الإيجارات فقالي إن المالك  عاوز يزوّد الإيجار 2000 درهم ولو مش عاجبك ، ممكن تسيب الشقة .
سألت المكتب عن أسعار الإيجارات دلوقتي لقيتها زادت قوي ، يعني نفس الشقة إللى انا فيها لو هتتأجر بسعر إنهاردة ، في زيادة 4 الاف درهم عن الإيجار إللى انا واخدها بيه السنة إللي فاتت .
قلت يا انهار ابيض ، ليه كدا ، يعني سنة واحدة تعدي ، الإيجارات تزيد 4 الاف درهم ، معني كدا إننا داخلين على أيام ما يعلم بيها إلا ربنا 
طبعا الأسعار مكنتش كدا زمان ، في 2008 ،  كانت أغلى بكتير يمكن 3 أضعاف الإيجار الحالي ، لكن بعد الأزمة الإقتصادية ، الدنيا نزلت قوووي ، وشكلها بدأت تطلع تاني ، لما الإيجار يزيد فى سنة واحدة 4 الاف درهم ، دا مرار طافح يابا .

المهم ، قانونياً في الإمارات ، المالك ملوش حق يزود الإيجار على المستأجر إلا بعد 3 سنوات ، 
وما دام إنت ملتزم بالدفع ، والشيكات بتاعتك مبتروحش البنك وترجع يبقى إنت في السليم ، والحمد لله انا كنت في السليم ،  يعني انا من حقي إني اخد الشقة بنفس الإيجار القديم وبالتالي مش من حق صحاب الشقة يزود عليا 2000 درهم دون وجة حق .
طبعاً هو كريم بردو ، محبش يصدمني ويزود الإيجار 4 الأف زى سعر السوق ، فقالي هزود  2000 درهم ويبقي زي المثل إللى بيقول " نقسم العرب عربين "  .
طيب أنا أعمل إيه دلوقتي ؟ اوافق ولا ارفض وأخش معاه فى متاهات ؟
- شربت واحد بيريل كبير ، وصرخت بصوت واطي " قول ، متخفشي ، المالك لازم يمشي " 
- بعدين جبت عقد إيجار جديد ( ودا بيبقى 3 نسخ ) ومليت البيانات زي العقد القديم بالضبط مع تغيير التواريخ للسنة الجديد ( ودا على برنامج العقارات إللي عندي  ، لو حد عاوز برنامج عقارات جامد جداً يقولي ) ، ورحت كاتب شيكات باأقساط الإيجارات 
( 4 شيكات ) زي السنة إللي فاتت بالضبط  مع تغيير التواريخ للسنة الجديد ، ورحت رايح على مكتب العقارات ومديهم ال 3 نسخ من عقد الإيجار و الــ 4 شيكات ، وقلتلهم : قولوا للمالك ،  المستأجر هياخد الشقة بنفس الإيجار ولو هو مش عاجبه ، يطلع على الشرطة ، إحنا جامدين قوي ومبنخفش .
وأخدت منهم إيصال بإستلام الشيكات ، وقلتلهم لما ياخد الشيكات يمضي على نسختي من العقد وتتصلوا بيا عشان أجي استلمها .

طبعاً انا عارف اول ما اطلع من المكتب هيتصلوا على المالك ،
رحت على الشقة ، وقفلت الباب بالمفتاح ، وقلت أستني إتصال من المالك او مكتب الإيجارات ، وقعدت اتخيل نفسي بقى زي عادل إمام فى فيلم " السفارة في العمارة " لما كانوا عاوزين يطلعوه من الشقة ، وفضلوا يقدموله إغراءات وخصوصاً لما رفع عليهم قضية ، 
لما النور قطع عليه وهو في الاصانصير وكانت راكبه معاه واحدة كدا أستغفر الله العظيم ، وبعدين حصل حاجات كدا استغفر الله العظيم ، وبعدين لقي نفسه متصور كدا وراح زي الـــ...... تنازل عن قضية السفارة في العمارة ، وأنا صرخت مفزوووع وقلت لاااااااااااااااا 
ولقيت نفسي واقع من على السرير ، تهيؤات ... تهيؤات ، الحمد لله ، الحمد لله ، مش راكب الاصانصير تاني  ومش هتنازل عن شقتي ، بس أكيد يعني مالك الشقة مش هيعمل كدا يعني ، أكيد مش هيركب كاميرات في شقتي لان المفتاح معايا انا بس :D ، بطل هبل يا طارق .

المهم تاني يوم الصبح ، لقيت مالك الشقة بيتصل بيا 
أنا : سلام عليكم
المالك : عليكم السلام ، كيف الحال
أنا : الحمد لله تمام 
المالك :أخوي ،  أنت واخد مني الشقة السنة اللي فاتت والحين الإيجارات كلها زادات ، والمكتب قالك اننا هنزود الإيجار ، إنت ليش تحط شيكات مثل السنة إللي فاتت .
أنا : أنا من حقي أخد الشقة بنفس الإيجار لمدة 3 سنوات 
المالك : كيف 3 سنوات ؟ انا ما اعطيتك الشقة 3 سنوات ، انا وقعت معاك عقد سنة واحد فقط .
أنا : ايوة بيتكتب فى عقد الإيجار سنة واحدة وبيتجدد كل سنة على نفس الشروط والدفعات لمدة 3 سنوات وبعد كده ليك الحق تزوده 20 % فقط وانا لو قبلت مش من حقك تطلعني .
المالك :  ليش مش من حقي اطلعك ، يا أخي خلاص انا مو بأجر شقتي ، انا ابغى الشقة لروحي وابغاها لأسكّن عيالي فيها وما بأجرها تاني ، 
أنا : ما دام حضرتك قبلت تأجرها ، يبقى أنا من حقي أسكن فيها 3 سنين بنفس القيمة ، وأنا مش كل سنة هدور على شقة وأنقل حاجتي . وحضرتك لو مش مصدقني ممكن تروح البلدية او قسم الشرطة وتسألهم هيقلولك نفس الكلام ، انا مش بقول كلام من عندي ، 
انا الساكن إللى جنبي ،حصل معاة نفس الموقف والمالك قاله مش هأجر وعاوز الشقة ، راح على البلدية وساب هناك نسخة من العقد والشيكات وهما اتصلوا على المالك وقالوله تعالى خد شيكاتك .
المالك : زين ...
أنا : المالك ملوش حق يطلع المستأجر قبل 3 سنوات ، وبردو حضرتك ممكن تروح البلدية وتسأل ولو قالولك ليك الحق تطلعني هطلع من الصبح .
المالك : كيف يعني ، انا ما أجرتك الشقة 3 سنوات ولا سنتين حتى ، العقد مكتوب فيه سنة واحدة ، بدي الشقة ياخي ، بدي أسكّن عيالي فيها ، وين اوديهم ، اتركهم في الشارع ؟ ، الشقة ملكي انا ، حقي انا ، ما حد يلزمني بشيء .
أنا : حضرتك انت بتتكلم صح وكل حاجة ، بس من وجهة نظرك ، لكن ما دام ارتضيت تأجرلي الشقة، يبقى انا من حقي كمان اني مطلعش منها قبل 3 سنوات وبنفس الإيجار ، ولو مش عاجبك كلامي ، روح اسأل البلدية او في الشرطة و قلهم عاوز ازود الإيجار و خليهم ييجوا يطلعوني 
المالك : خلاص انا بشوف ، سلام 
أنا : اوك ، سلام 

وقفلت مع المالك ورحت رامي الموبيل على المكتب ( بشويش ) وقلت هااااااأو ، قالي يزود عليا الإيجار قال ، نحن قوم لا نستسلم ، ننتصر او نموت ( بعد الشر عليا طبعا )  .
هااااااأو  كمان مرة ،  لا عاش ولا كان إللي يضحك عليا او يستغفلني ( غير المدير بتاعي فى الشغل :D )  .

تاني يوم الصبح ، إتصلت على مكتب الإيجارات اسألهم عن الجديد ، قالوا المالك مجاش ولا اتصل
قلت الراجل شكله هيبعتني ولا هيعمل إيه ، أكيد بيدبرلي ميبة ،  مبدهاش بقي ، ننقل على الخطة طــ  ( الصراحة مش  عارف إيه طــ  ، بس أكيد اول خرف من أسمي )
رحت مطلّع الموبيل وباعتله رسالة ( نفس الرسالة إللى في الصورة )
" سلام عليكم 
ياريت ترد علينا انهاردة لو مش هتستلم الشيكات وتمضي عقد ايجار الشقة 1603 
عشان اروح اوديهم البلدية لاني مسافر الاسبوع الجاي "

طبعا كتبت رقم الشقة فى الرسالة عشان مضمنش هو ممكن يعمل إيه ، ممكن يماطل ، او يقول مستلمتش حاجة ومكتب الإيجارات مبعتليش حاجة ، ومأخدتش شيكات .
وطبعا مكتب الإيجارات ممكن يبعني لو إداهم 100 درهم ، او من غير فلوس كمان  ، فقلت استعمل الرسالة كمستند رسمي وربنا معانا بقى .

نفس اليوم العصر ، لقيت مكتب الإيجارات بيكلمني ، بيقولي المالك هنا وعاوز يكلمك ، قلت اوك اعطيني إياه 
المالك :  سلام عليكم
أنا : عليكم السلام
المالك :  أخوي ، ها الشيكات إنت كتبها بتاريخ 10 في الشهر ، وإنت واخد الشقة من تاريخ واحد فى الشهر ، يعني المفروض الشيكات تكون بتاريخ واحد في الشهر 
أنا : طيب حضرتك إحنا مش متفقين من السنة إللي فاتت إن الشيكات تكون بتاريخ 10 في الشهر ، عشان اوقات المرتب بتاعي بيتأخر ، وعشان ابقى ضامن إن في فلوس فى حسابي فى البنك 
المالك :  هادا مو ذنبي ، انا ما باخد الشيكات بتاريخ 10 في الشهر ، على الأقل تكون بتاريخ 5 في الشهر 
أنا :  حضرتك مفيش فرق كبير بين 5 او 10 في الشهر ، إنت عمرك ما رحت تصرف شيك ليا ورجع ، عشان انا بظبطهولك على 10 في الشهر 
المالك :  ما بعرف ، بدي الشيكات تكون بتاريخ واحد في الشهر او 5 في الشهر بالكتير 
( قلت فى نفسي : متكسرش بخاطر الراجل ،دا غليان ،  يعني مش كفايا إنك مقبلتش تزود الإيجارات ، مش هتيجي على 4 شيكات تانين بتاريخ 5 في الشهر ، ويبقى إسم الراجل صمم على حاجة ونفذها  ) 
أنا :  اوك يا حج ، إللي تحيه هعملهولك ، بس انا معييش شيكات حالياً ، هروح البنك اجيب دفتر شيكات مخصوص عشان اكتبلك الشيكات الجديد .
المالك :  أمتي ؟
أنا :  على اول الأسبوع إن شاء الله بتكون الشيكات في المكتب 
المالك : اوك 

ورحت غيرت الشيكات وسبتهم في المكتب ، وسألتهم وقع العقد ولا لسه ، قالولي لسه ، قلت خلاص ، متدهوش الشيكات إلا لما يوقع العقد ، قالوا أكيد 
وتاني يوم أتصلوا بيا وقالولي مبروك ، تعالى خد العقد 
قلت : اخيرااااا ، الحمد لله 
وانا بستلم العقد من المكتب ، بيقولولي هات 500 درهم عمولة للمكتب ، قلتلهم 500 في عينكم ، على إيه ، هي السنة الأولى وبس ، غير كدا ، ملكوش حاجة عندي ، يلا يا ولاد الـــ ..... .

في الإمارات : ما دام إنت ماشي فى السليم وعارف حقوقك كويس ، هتقدر تاخدها ومحدش يقدر يكلمك ، لكن لو متعرفش ، او  خفت ، او استسلمت ، يبقى هتروح في الرجلين ، والواحد مبيتعلمش ببلاش ، لازم تعرف حقك ومضيعهوش ، وزي ما قالوا زمان " لا يضيع حق وراءه مطالب " .

إنهاردة وحتى كتابة هذة السطور ، الإيجارات زادت تاني ، بقى الفرق بين الإيجار بتاعي وإيجار السوق 7 الاف درهم ، لنفس الشقة ،
 يعني بتهيألي لو جيت أجدد السنة الجاية ، ممكن المالك فعلا يعمل معايا زي إللى حصل مع عادل إمام فى فيلم " السفارة في العمارة " والنور يقطع فى الصانصير ،
 بس متخفوش  ، لن أضعف ، لن استسلم ، هتأكد الأول إن الشقة مفيهاش كاميرات مراقبة :D .

معلومة : المالك يقدر يطلّع المستأجر من الشقة لو راح البلدية وقدم طلب إنه عاوز الشقة قبل نهاية عقد الإيجار بشهرين ، لو لو المستأجر تأخر فى دفع الإيجار او شيكاته رجعت من البنك بدون رصيد ، غير كدا ، المستأجر فى السليم ومحدش يقدر يطلعه   .


بقلم : طارق حسن
www.facebook.com/tarekfalcon

تابعونا على الفيس بوك صفحة هذا ما رأيت فى دبى
www.facebook.com/DubaiDays

هناك تعليق واحد:

  1. فى بلاد القانون و فقط "كان يفضل تلك الجملة فى النهايه"
    و لو امكن برنامج العقارات mohamed_nabil_elagder@yahoo.com

    ردحذف

ما هو رأيك فى مدونة "هذا ما رأيت فى دبى" ؟