23‏/07‏/2013

تجربتى مع شهادة مدير المشاريع المحترف PMP



تعد شهادة "مدير المشاريع المحترف (PMP)"  من الشهادات المتعارف عليها دوليا في أنحاء العالم وأكثرها أهمية لدى مسئولي المشاريع حاليا، وتحظى هذه الشهادة كذلك باهتمام المكاتب الاستشارية والمقاولين ومدراء المشاريع الذين تتضمن مهام عملهم الإشراف وتنفيذ المشروعات ومتابعتها ومراقبة المتطلبات الفنية والمالية في كل من القطاعين الخاص والحكومي.

أهمية شهادة PMP:
- أكثر الشهادات شهرةً واحتراماً عالمياً في هذا مجالإدارة المشاريع .
- صنفت كرابع أكثر شهادة طلباً حول العالم في عام 2006.
- أصبحت مطلب أساسي للكثير من الوظائف الخاصة والحكومية وخاصة فى منطقة الخليج .

الغرض من الدورة 
- تغطية معرفية شاملة لكل مواضيع إدارة المشاريع.
- التعرف على الطرق المختلفة لاختيار المشاريع.
- التعرف على كيفية تأسيس المشاريع.
- الممارسة العملية للتخطيط الزمني والمالي.
- التعرف على كيفية تحديد الأعمال الخاصة بالمشروع وتكوين فرق العمل.
- الممارسة العملية لمراقبة المشروع وضبطه.
- التعرف على أنواع العقود وآليات التعاقدات والإشراف عليها والاستلام.
- دراسة عميقة للدليل المعرفي لإدارة المشروعات 2004.
- تغطية كل مواضيع امتحان (PMP) التي تمكن الدارس من تجاوز الامتحان

بعد التعريف البسيط بالشهادة ، نقدر نبدأ تجربتى مع الشهادة دى ( وإللى مش عاوز يقرأ التجربة ، ممكن يروح للملخص فى الأخر ) :-

الواحد دائما لازم يحاول يُحدث نفسه على قدر المستطاع زى الانتى فيرس كدا ، لازم تعمله أبديت وإلا هيصبح نظام أمنى ضعيف ويمكن اى فيرس يخترقه .
ومع متابعتى لكثير من شروط الوظائف كمدير مشروع ، كنت دايما بلاقى شرط الحصول على شهادة PMP
فقلت خلاص لازم اخدها ، وبدأت ابحث عن مراكز التدريب فى الإمارات ، واتصل هنا وهنا واشوف الاسعار والأماكن وكل حاجة وكانت الاسعار تتراوح بين 5000 و 4000 و 3000 وانا قلبى الصغير لا يحتمل .
المهم توصلت لإتنين من مراكز التدريب ، واحد فى دبى ، والتاني له فرع فى دبى وفرع فى الشارقة ،
بدأت اتفاوض معاهم على السعر ، دا يقولى سعر ودا يقولى سعر ، بدأنا التفاوض من 3500 درهم ، ولعبت معاهم البيضة والحجر ، 
 يعنى اتصل ع الاول واقوله إنى بفكر أحجز مع مركز كذا ( وأقوله على إسم المركز ) اصل سعره اقل من سعرك بس هو هيبدأ بعدك بأسبوعين، وانا مش مستعجل على الكورس فممكن أستناه ، لكن لو نزلتى السعر ممكن أفكر  ، 
طبعا كونه عرف الأسم يبقى تأكد انى تواصلت معاهم فعلا ، فبيحاول ينزل السعر ، ولأن موعد بدأ الكورس كان قرب فعاوز يضمن إشتراكى ،
المهم في الاخر أخدت الكورس على 2000 درهم ، وكنت الوحيد فى الكلاس ( المجموعة ) إللى واخد الكورس بالسعر دا ، الكل كان بين الـــ  3000 و الـــ  2500 والعبد لله ( أنا ) الوحيد إللى  واخد بــــ 2000 درهم .
وبدأنا الكورس ، وكان كل يوم جمعة 7 ساعات من  الساعة 2 الضهر  لحد 9 مساءاً يتخللهم 2 بريك ( فترتين راحة ) لمدة 15 دقيقة لكل بريك ، إللى عاوز يشرب شاى / نسكافية او يصلى .
أحسن شىء حبيته فى المركز هو غرفة الشاى والنسكافية والبسكويت ، كنت بنتقم من البسكويت دا ، ولما البريك يخلص ، كنت أحط شوية فى منديل واخدهم معايا اتسلى فيهم جوا لما الواحد بيفصل من الشرح .
مدة الكورس كانت 5 أسابيع ( الكورس 35 ساعة ) ، لكن إحنا اخدناهم 6 أسابيع ودا كان حالة طارئة 
اول يوم جابولنا مدرب ( إللى هيشرح الكورس  ) كان شرحه جميل جدا ، راجل خبرة كبيرة، مهندس مدنى وكنا مبسوطين جدا من شرحه ، كان باكستانى تقريباً 
  الأسبوع التانى ، لقينا مدرب تانى ، شباب ، وكل شوية يقرأ من مذكرة، حسينا إنه بيسمّع ، حافظ مش فاهم ، 
كنا فى الكلاس 4 عرب ( انا ( مهندس برمجيات ) و 2 مصريين وواحد إماراتى ودول كانوا مهندسين مدنيين ) والباقى هنود وباكستانيين ، المهم الأتنين المصريين والإماراتى مشيو من نص الشرح وواحد منهم إتصل بيا وقالى إننا مشينا عشان مش فاهمين حاجة والمفروض نطالب بتغيير المدرب دا ، قلتلهم ماشى ، بس انا مش همشى ، هفضل لآخر اليوم ومعاكوا فى الموضوع ، ابعت إنت إيميل وسبلى الباقى .
وبالفعل بالليل بعت إيميل لإدارة المركز يطالب بتغيير المدرب وبعت نسخة من الإيميل لكل الطلبة إللى معانا فى الكورس .
وكنا عرفنا الإيميلات من اول يوم ، المدرب الأولانى طلب إن كل واحد يكتب إسمه وإيميله فى ورقة وواحد ياخدهم ويبعت إيميل للكل عشان يبقى زى جروب نتبادل الأفكار او الإستفسارات .
اول ما وصلنى الإيميل عن تغيير المدرب ، رديت عليه وكان رد قاسى شوية ، عملت حرب فى الموضوع ومع إن المدرب الجديد كان من مجالى ، تقنية المعلومات ، لكن موقف تغييره بدون الرجوع لينا كان وحش وغير إنه مش خبرة قوى .
دا كان نص الإيميل إللى بعته || http://bitly.com/130UivV

وبدأت الناس تتشجع و ترد على الإيميل بالتأكيد على تغيير المدرب ، لكن إيميلى عمل رد فعل عند إدارة المركز وتانى يوم المدير العام بتاعهم إتصل بيا وإللى إنتوا عاوزينه وهنغيره ،  بس بلاش الإيميلات القاسية دى وإحنا أهم حاجة عندنا إن المتدرب يكون مبسوط .  
- ماشى بس اهم شىء إحنا عاوزين المدرب الإولانى ، 
- إحنا بنحاول معاه لأن حصله ظروف ( عرفنا بعد كدا إنه سافر أمريكا ) ولو مجاش هنجبلكم واحد تانى كويس 
- لأ مش عاوزين حد تانى ، مش هنقضيها تجارب فى المدرب، عاوزين الأولانى 

الجمعة إللى بعدها لقينا مدرب جديد غير اللى طلبنا إنه يرجع ، كان هندى ، اول ماش شفته قلت يادى النيلة ، يعنى أطلع ازعق واقول هاتولى راااجل ، قصدى هاتولى المدير ، قلت أصبر لما نشوف هيبقى نظامه إيه ، شكله كبير وأكيد خبرة
وفعلا ، الراجل كان موسوعة بمعنى الكلمة ، تكلم عن نفسه شوية ، طلع من اوائل الناس إللى اخدت شهادتة ال PMP ، وكان شغال فى شركة HP  وتدرج فيها لحد ما أصبح مدير عام لبعض المشاريع فى الشرق الأوسط ، ومش كدا وبس ، لأ دا كما كان تم إنتدابه من HP فرع مصر عشان يدى كورس إدارة مشاريع للوزراء في حكومة نظيف ،  يا ولاد ال .... ، يعنى خلاص مصر مفيهاش واحد كفء يديكوا كورس إدارة مشاريع ، رايحين تيجيبوا واحد من HP ، وزارة زى القرع بتمد لبرة ، دا أكيد اخدوا فلوس بالهبل على الموضوع دا ، طب كنتوا أستنوا ملا أخلص الكورس وأجى اديكوا انا :D .
سألته : طيب إنت كنت شغال فى HP ، ليه سبتها ؟
قال إنه فى سنة 1997 كان حصل تفجير فى فندق فى السعودية ،  ، وكان هو الوحيد الناجى من الناس إللى كانت موجودة فى الفندق، إستخبى تحت السرير ههههه ، وكل الجرايد كتبت عنه فى الوقت دا بأعتباره الناجى الوحيد .
ومن وقتها وهو مبيحبش يروح السعودية إلا تخاطيف ، وفى الفترة الأخيرة الشركة اخدت مشاريع كبيرة فى السعودية وطلبوا منه ينتقل إقامة دائمة هناك فرفض وقال أنا عاوز افضل فى دبى وطبعا شركة زى HP مينفعش حد مهما كان يفرض رأيه عليهم فتفاوضوا معه يا إما يروح السعودية يا ياخد مبلغ كويس كنهاية خدمة ومفيش حل تانى ، فوافق على نهاية الخدمة وبدأ يدى كورسات كمدير مشروع فى مراكز مختلفة .
بصراحة انا مكنتش عاوزه يشرح الكورس على قد ما كنت عاوزه يتكلم عن خبراته وحياته العملية .

لما بدأ شرح ، كان حاجة جامدة جدا ، أحسن من الأولانى إللى كنا عاوزينه يرجع ، وكان كل نقطة يشرح بمثال من المشاريع إللى اشتغل فيها .
ومع البريك الأولى ، لاقيت مدير المركز بيتصل بيا يطمّن إيه الأخبار ومبسوطين ولا إيه ، قلتله دا الراجل دا جامد ، وشكرته على إهتمامه .
وبعد 6 أسابيع إنتهى الكورس على خير والحمد لله ، بدأنا 23 ديسمبر 2011 وإنتهينا 27 يناير 2012 .
دى شهادة الدورة || http://bitly.com/PMPCourse

قلت لنفسى ـ  إن شاء الله  فى خلال شهرين بالكتير هذاكر وادخل الإمتحان الدولى عشان ابقى سرتفيد بقى ، لكن الإنشغال والكسل والتسويف ، أجلوا المذاكرة من أسبوع لشهر لسنة ،
هو مكنش كسل قوى ، انا كنت كل فترة أبدا بهمة ونشاط وبعدين الهمة تقل وتقل وتقل لحد ما تتعدم ، يعنى الفصل الأول من الكتاب يمكن ذاكرته ييجى 5 مرات ، رجعت أعيش ايام الدراسة تانى ، أيام ما كنت طالب ، بس مكنتش كسيل كدا ، بس ممكن عشان الشغل ، لان الواحد بعد الشغل بيرجع تعبان والتركيز بيبقى قليل جداً .
كنت اول ما ابدأ اذاكر ، الاقى النوم بيجيلى من كل مكان ، ويبقى شكلى كدا || http://on.fb.me/130V2Bf

ومرت الأيام لحد ما لاقيت نفسى مضغوط ، إنى لازم أدخل الإمتحان قبل 31 يوليو 2013 لان الإصدار الجديد من الإمتحان ( 5 ) هينزل ، وانا اخدت الكورس على الإصدار رقم ( 4) .

وعشان أضغط نفسى واحطها قدام الأمر الواقع ، إشتركت فى عضوية الموقع  www.pmi.org  بتاريخ 21/03/2013 ودفعت فلوس الإمتحان ، يعنى خلاص لازم تدخل الإمتحان  يا هتضيع عليك الفلوس 
وكانت كالأتى
139 دولار  = 525 درهم إشتراك عضوية لمدة سنة على الموقع 
405 دولار  = 1530 درهم رسوم الإمتحان 

مكنش فاضل إلا إنى أحدد يوم الإمتحان ، فقلت ابدأ المذاكرة بقى وبعدين أبقى احدد اليوم بعدين ، لكن كان لسه فى كسل ، كان لازم اضغط نفسى تانى ، عدى أكتر من شهر ونص من وقت ما حجزت ولسه ما خلصتش ، أعمل إيه ؟
قلت أضغط نفسى تانى واحدد يوم الإمتحان عشان ميبقاش قدامى اى حجة للتأجل ن وبالفعل حددت الإمتحان يوم الثلاثاء  14/05/2013 ، قبل عيد ميلادى بيومين 16/05 ، قلت يعنى الواحد يحتفل بنجاحه وبعيد ميلاده ، 
الحجز بيكون من موقع www.prometric.com  ، لما بتدفع الفلوس على موقع pmi.com بيديك كود زى دا
 PMI Eligibility ID: 2682377E2
بتدخل على موقع  prometric.com وعن طريق الكود دا بتقدر تحدد المكان والزمان إللى انت عاوز تمتحن فيه فى اى دولة  ( هعمل فيديو إن شاء الله بالخطوات كاملة
وبعد ما حجزت يوم الإمتحان ، بدأت اضغط نفسى وأضغط نفسى واذاكر واذكر والأيام بتجرى وتجرى والإمتحان قرب ولسه مخلصتش ، يا انهار ابيض ، يا انهار ابيض .
أخدت اجازة من الشغل من يوم السبت 11 مايو وبدأت اذاكر أكتر واراجع ، لكن كان فى حاجة نقصانى ، مكنتش بحل اسئلة كتير ودا كان شىء لازم جدا عشان تتعود على نظام الأسئلة والوقت 
الإمتحان النهائى بيكون 200 سؤال فى 4 ساعات يعنى السؤال دقيقة و 20 ثانية ، لو سؤال أخد اكتر من دقيقة و 20 ثانية يبقى اعرف ان فى سؤال مش هتحله ، فكان لازم أدرب كويس على نظام الأسئلة وأحل امتحانات كتير 
لكن الوقت مكنش فى صالحى ، يا دوبك خلصت الكتاب حوالى 500 صفحة وراجعته وكمان المراجعه مكنتش كامله ، فكرت فى تأجيل الإمتحان بس المووضع مكنش سهل ، لازم التأجيل يكون قبل يوم الإمتحان بيومين وبتدفع رسوم 70 دولار ، لو اقل من 48 ساعة بتروح عليك الفلوس إلا فى حالات طارئة زى حادثة او شىء من هذا القبيل ، ربنا يحفظنا .
سلمت امرى لله وقلت خلاص روح وربك يسهل ولن يصيبنا إلا ما كتب الله لنا .
ليلة الإمتحان نمت كويس عشان لازم اروح مركز ، دول 4 ساعات مينفعش تاخد فيهم ثانية سهو ، ولا حتى فيمتو ثانية ، الوقت كالسيف ان لم تقطعه شمبرك قصدى قطعك .
يااااه ، الواحد رجع تانى لآيام الإمتحانات والكلية والثانوية ، اتذكر مرة وانا فى تانية كلية ، كانت مادة الإقتصاد او مبادىء الإقتصاد ، فضلت اذاكر وأحل اسئلة يومين ورا بعض مطبق ( يعنى مفيس نوم ) ورحت الإمتحان مكنتش نمت حاجة ،
وأول ما مسكت ورقة الاسئلة ، لقيت على الأسئلة كلها ، ولقيت نفسى عرفهم كلهم ، وبدأت احل وأكتب فى كراسة الإجابة ، ولقيت نفسى نمت ، نوم كامل ، كان ناقص بس المراقب يجبلى مخدة ، وكنت افوق بعدها ب 10 دقايق ، كنت هجنن ، وهعيط ، مش عارف أسيطر على نفسى ، فى وسط ما أنا بكتب في الحل ، الاقى نفسى نمت ، والحمد لله ربنا سترها وجبت فى المادة دى إمتياز .
نرجع لموضوعنا ، صحيت يوم الإمتحان بدرى فطرت ولبست واتحركت ، ولا، الواحد اعصابه سايبه ، وعاوز يستغل كل دقيقة يراجع ، مقدرتش اروح بالعربية وكمان عشان ميكونش فيه إحتمالية للتوهان ويضيع عليك الإمتحان .
أخدت تاكسى وبعديه باص وبعديه المترو وبعديه تاكسى تانى لحد ما وصلت مكان الإمتحان فى Dubai Knowledge Village وطول الطريق عمال اراجع والحاجات كأنى بشوفها اول مرة ، استرها علينا يارب .
وصلت قبل الموعد بساعتين ، كان الميعاد بتاعى 12  لــ 4  ، دخلت اديتهم البطاقة بتاعتى عشان أثبت حضورى ، 
الست إللى هناك قالتلى تحب تمتحن بدرى ، لو عاوز تدخل دلوقتى ، فى أماكن فاضية ، قلتلها لأ هدخل فى ميعادى ، قالتلى اوك مكن تروح وتيجى قبل الموعد بنص ساعة ، يعنى على 11 ونص كدا .
رحت قاعدت فى الإستراحة ، اراجع ، لكن مكنتش عارف اركز ، حاجات عماله تعدى قدامى رايح جاى ، سحالى أجنبية وعربية ، صواريخ أرض جو ، والجو حر ، والناس مش طايقة هدومها إللى مش موجودة أصلاً  واستغفر الله العظيم ، ركزّ يا طارق مش وقته ، انت داخل على منعطف تاريخى .
مر الوقت سريعاً واقتربت ساعة الصفر ، دخلت الحمام ، قلت عشان قدامك 4 ساعات مش هتعرف تتحرك ، وبعدها دخلت المركز ، وقعدت شوية ، وجت ست وإدتنى ورقة فيها إرشادات الإمتحان ، متحاولش تغش او تعمل صوت ، المكان كله محاصر وآى حركة هنضرب فى الكليان ، قصدى المكان مراقب بالكاميرات ، تصطحب معك اى حيوانات كالقطط والكلاب ، طيب لحظة اطلع التنين بتاعى برة عشان معملش صوت ، إنتوا عالم فاضية ، والواحد مفهوش  أعصاب إن اقرأ حاجة اساساً ، وبعدين هغش إزاى ، يعنى مثلا مثلا لو معايا الكتاب وفى سؤال معرفتش هروح الف فى 500 ورقة ادور على الحل ، ووقت السؤال دقيقة و 20 ثانية ، يا راجل كبر مخك .
بعد شوية جت أخدت منى وقرة الإرشادات وادتنى مفتاح لدرج وقالتلى حط ل اللى معاك فى الدرج دا واقفل الموبيل واستعد هنادى عليك بعد دقائق .
حطيت كل حاجة معايا فى الدرج ، ورق ، موبيل ، محفظة ، صرة من الدنانير وقفلت الدرج ودخلت من باب غرفة التفتيش قبل غرفة الإمتحان .
واحدة ست تانية واقفة وماسكة معاها جهاز عامل زى الصاعق الكهربائى كدا ، إيه سا ست ، هتموتيتى ولا يه ؟؟
دخلت عليها ، قالتلى ارفع ايدك فوق ، قلتلها لأ ، اسمها ارفع راسك فوق ، إنت مصرى :D
رفعت ايدى ومشت عليا الجهاز ، جهاز زى بتوع المطار كدا ، على اساس انى ههرب مخدرات للى بيمتحنوا جوه 
طلع جيوبك برة ، حاضر
الجيوب اللى ورا كمان ، حاضر
ارفع البنطلون ، إيييه ؟ في إيه يا ست ؟
عاوزه تشوف مخبى حاجة فى الشراب ولا الجزمة ، ماشى يا ستى ، شوفى .
دا كله والواحد اعصابه باظت ، عارفين إحساس الست اللى رايحه تولد ومن كتر القلق والتعب بتترجى الدكتور يديها حقنة ولا حاجة عشان تولد بسرعة ؟ اهو نفس الإحساس دا :D

دخلت الإمتحان ، بيدوك كراسة فيها ييجى 6 وراقات كدا وقلمين رصاص ، عشان لو عاوز تكتب ملاحظات او عملية حسابية او اى حاجة 
اول ما بتدخل ويشغلولك الجهاز بتاخد 15 دقيقة للتعريف بالإمحتان ،  بيشرحلك كيفية التعامل مع الإمتحان والزراير المختلفة وكيفية إستخدام الآلة الحاسبة ، 
المفروض إن الواحد يكون عارف الحاجات دى كلها ويستغل ال 15 دقيقة فى كتابة اهم جدول فى الكتاب وإللى المفروض تكون حافظة (جدول عمليات ادارة المشروع )  لان الإمتحان كله بيعتمد عليه بالإضافة إلى ما تتذكره من قوانين أخرى .

وبدأ الإمتحان والوقت بيجرى ، اسئلها أحلها واسئلة تاخد وقت فى التفكير وعدت ال 4 ساعات زة الصاروخ  وظهرتلى شاشة إنتهى الوقت ولم أتمكن من حل جميع الإسئلة وبدأ الكمبيوتر فى تحليل النتيجة ، وقلبى بيدق بطريقة فظيعة وكأنه هيتخلع ، يارب ، يارب ، ودا عمال يحسب فى النتيجة ،خلص ياعم ، قلبى هيقف ، يارب سلم سلم ، وظهرت النتيجة
Failed
صدمة وعدم القدرة على الحركة ، إزبهلال ، ثم الحمد لله على كل حال 
إحساس لا يوصف ، فاشل ، لا حول ولا قوة إلا بالله ، 
الواحد عمره ما سقط فى إمتحان ، إلا فى الإمارات ، المرة الأولى لما أخدت " راسب " فى إختبار السواقة ، ودى المرة التانية 
خرجت من المركز  لا آى أمامى ، والحزن يعتصرنى ، واخدت ورقة مكتوب فيها فاشل، وعدت من حيث أتيت بخفى حنين .
لا يمكن ان يشعر أحد بهذا الإحساس ، انا فقط ، لكن الحمد لله على كل شىء ، قدر الله وما شاء فعل .
رجعت للبيت ، نمت ، مليش نفس لأى شىء ، ولا برد على تليفون ولا اى شىء
وإتصالات من كل حتة ، من مصر ومن صحابى ومن الشغل ، الكل عارف إنى بمتحن ، إيه الذل دا 
صعب جدا تقول لوالدك ووالدتك ، منجحتش ، عمرها ما حصلت اساساً ، 
والفيس بوك ، رسايل كتير ، ها يابنى عملت ايه طمنى ؟
إيه الاخبار يا باشمهندس ؟
يادى النيلة ، يادى الفضايح ، عدى الايام دى على خير يارب .

قلت لنفسى "متيأسش ، إن الفشل هو بداية النجاح " وإنت غلطت ، مذاكرتش وحليت إمتحانات كويس ، تخطيطك كان غلط ، حجزت للإمتحان عشان تضغط نفسك ومحسبتش الوقت كويس .
ةوكنت وكنت دائما اقول " الفشل جند من جنود النجاح " ، ودا مش نهاية المشوار 
اخدت أسبوع راحة كدا من المذاكرة ورجعت تانى أخطط كويس وبدأت اذاكر من تانى ولأنى بعد الشغل بيكون الواحد تعبان وصعب يذاكر ، فكنت بصلى العشاء وأنام واصحى الفجر اصلى وأذاكر لحد ما اروح على الشغل وفضلت على كدا اسبوعين لحد ما خلصت مذاكرة الكتاب ، وقلت أحجز على الاسبوع الجاى وابدأ احل إمتحانات ، الكلام دا كان يوم 19/06/2013 ، قلت أحجز على 27/06/2013 دفعت الفلوس ، وكانت 275 دولار رسوم إعادة الإمتحان ورحت عشان أحجز ليوم 27 ، ملقتش يوم فاضى إلا يوم السبت 23 ، واليوم إللى بعده 09/07/2013 ، يا انهار ابيض ، 09/07 إيه ، انا كدا هكون نسيت إللى ذاكرته ، فضلت اعمل ريفرش يمكن اى حد يكنسل وأحجز مكانه ، وبالفعل كان فى مواعيد بتظهر ، بس الوقت كان 7ونص الصبح والوقت دا مش مناسب خالص .
فضلت 24 ساعة ادخل على موقع الحجز واعمل ريفرش إن حاجة تظهر لكن بدون جدوى ، توكلت على الله وحجزت على يوم 09/07/2013 وبدأت احل إمتحانات وأعمل مراجعة ومقلتش لحد إنى همتحن ، مش ناقصة إحراج تانى ، لما انجح إن شاء الله ابقى اقولهم 
.
أخدت اجازة تانى من الشغل من يوم الاربعاء 03/07 لحد يوم الثلاثاء يوم الإمتحان 09/07  ، ورحت الإمتحان وإتفتشت تانى ، ودخلت الإمتحان وكنت مستبشر خير .
وكان فى فرق كبير فعلا ، الواحد كان بيحل الاسئلة زى الصاروخ ( الله اكبر .. الله اكبر ) وخلصت الأسئلة كلها قبل ما الوقت يخلص وراجعت كمان على الأسئلة إللى كنت معلم عليها .
وبعد ما الوقت خلص ، وبردو كنت مستبشر خير والكمبيوتر بيحلل النتيجة ، وفضلت اقول يارب ، يارب ، يارب ، وهووووووووووووووووووووووب
Congratulation, you pass the Exam

الله اكبر ،الله اكبر ، لقد هرمنا من أجل هذة اللحظة ، حد يشغلنا " الناجح يرفع إيده " ، " وحياة قلبى وافراحه
ودى الشهادة 

طولت عليكو انا عارف ، خلينا نختصر الموضوع بالنقاط المفيدة 
1- مينفعش تدخل الإمتحان بدون أخذ دورة من مدرب معتمد مدتها ( 35 ساعة ) ، دا شىء إجبارى 
2- وإنت بتاخد الكورس ، لازم تذاكر بالتزامن ، يعنى متخلصش الكورس وبعدين تبدأ تذاكر ، هتتأخر وهتأجل وفى حاجات كتير هتضيع منك وتاخد منك وقت .
3- بعد كل شابتر تذاكره ( فصل ) حل على الأقل 20 سؤال عليه .

الكتب إللى تذاكر منها وإللى انا ذاكرت منها 
1-  كتاب  PMBOK ودا هتاخده فى الكورس 
2- كتاب ريتا    Rita PMP Exam Prep
3 - إمتحانات PMP Fast Track
ودا رابط ممكن تحمل منه الكتب دى + برنامج الإمتحانات 
http://bitly.com/TarekPMPFiles

ودا شرح كامل للكورس بالعربى ( 35 ساعة ) فيديو  للى حابب يتفرج عليه او يرجعله وهو بيذاكر لو فى حاجة مش فاهمها 

تكلفة الشهادة كاملة 
1- الكورس ( من 2000 درهم ل 3500 درهم ) حسب المكان إللى هتاخد فيه 
إللى موجود فى الإمارات وعاوز ياخد فى نفس المركز إللى اخدت فيه يبعتلى رسالة عشان محدش يقول بتعمل دعايا :) 
2- تكلفة حجز الإمتحان 
إشتراك عضوية لمدة سنة على الموقع  139 دولار  = 525 درهم 
رسوم الإمتحان  405 دولار  = 1530 درهم 
ولو لا قدر الله منجحتش وهتعيد الإمتحان ، بتكون تكلفة الإمتحان  275 دولار  = 1,015  درهم 
يعنى شاكب راكب كدا زى ما بيقولوا ، فى حدود 5 الاف درهم ، دا غير ايام الغياب والخصم من المرتب ، بس إن شاء الله يكون ليها فائدة فى المستقبل .

دى فيديوهات عملتها كملخص لكيفية التسجيل فى الموقع والحجز للإمتحان  وكيفية المذاكرة ونصائح للإمتحان ، وبالتوفيق للجميع إن شاء الله 
 1 - كيفية التسجيل فى الموقع والحجز للإمتحان 
How to Register for PMP Exam 

ملف إكسل هيفيدك فى التسجيل للإمتحان

2- كيفية المذاكرة / الإستعداد للإمتحان 
How to Study for PMP Exam and Pass 

لو حاسس إنك إستفدت ، متخلهاش تقف عندك ، إعمل شير فى الخير :) 

طارق حسن 
www.facebook.com/tarekfalcon
تابعونا على 
www.facebook.com/DubaiDays

هناك 26 تعليقًا:

  1. شكرا للمعلومات المفيدة ومبرك الشهادة القيمة دي

    ردحذف
  2. شكرا للمعلومات المفيدة ومبرك الشهادة القيمة دي

    ردحذف
  3. شكرا للمعلومات المفيدة ومبرك الشهادة القيمة دي

    ردحذف
  4. جزاك الله الف خير اخ طارق, معلومات فعلا مفيدة ومفصلة وساعدتنا.

    ردحذف
  5. انت لكاك أوى

    ردحذف
  6. شكرا على الافادة ولو سمحت اسم المركز لانى ناوى اقدم للكورس

    ردحذف
  7. جزاك الله خير على المعلومات المفيده

    ردحذف
  8. شكرا لك على المعلومات القيمة والف مبروك لنجاحك

    ردحذف
  9. يعطيك العافية اخ طارق, عندي سؤال لو سمحت.
    لو الواحد ماعنده اي خبرة بادارة المشاريع, كيف ممكن يتعامل مع هذا الشرط من شروط الشهادة؟
    وشكرا

    ردحذف
  10. المعلومات مفيدة بس كان الموضوع هيبقا أحسن لولا الاستظراف الكتير :) عموما شكرا جزيلا

    ردحذف
  11. شكراً على هذه المعلومة كنت بحاجة لها جزاك الله خيراً

    ردحذف
  12. شكرا والله امتعتنا وفي دربك نسير إن شاء الله بس نجاح من أول مرة

    ردحذف
  13. السلام عليكم
    شكراً أخي الكريم طارق على هذا السرد اللطيف والمعلومات
    استفدت مما ذكرته ، وبإذن الله خططت أن أدخل الامتحان في نهاية أبريل، إن واجهت أي عقبة سأسألك عنها، كذلك أشكرك على الملف في الدروب بوكس،

    مع وافر الاحترام والتقدير
    م.نواف

    ردحذف
  14. ماتخدش بسكويت معاك للقاعة تحت اي مبرر ، الحركات دي بتضحك الناس عالمصريين ، شكرا عالمعلومات المفيدة.

    ردحذف
  15. شكرا لنشر تجربتك والملفات

    ردحذف
  16. مشكور عزيزي طارق على المعلومات القيمه واسلوبك الرائع والدقيق في السرد
    ربنا يجعلها في ميزان حسناتك

    ردحذف
  17. متشكرين يا باشمهندس ع التفاصيل الدقيقة... pmp عملت شغل فعلا :)

    ردحذف
  18. جزاك الله خير علي الافادة وربنا يوفقك ومن نجاح لنجاح باذن الله

    ردحذف
  19. شكرا وجزاك الله خيرا

    ردحذف
  20. جزاك الله خير ويباركلك

    ردحذف
  21. شكرا ضحكتنى اسلوبك ظريف و دمك خفيف

    ردحذف
  22. ألف مبروك ولو متأخرة. ربنا يكتبلك كل التوفيق في حياتك الشخصية والعملية. ومتشكر جدا على الإفادة :)

    ردحذف
  23. استفدت كتير بس ممكن توريني اتواصل عاك ازي عشان انا يادوب بدور على معهد امتحن منو

    ردحذف
  24. شكرا جزيلاً ياطيب على هذه الفائدة الكبيرة من المعلومات /كنت بحاجه لها بارك الله فيك /عبدالاله محمد م العراق

    ردحذف
  25. أزال المؤلف هذا التعليق.

    ردحذف
  26. ايه موضوع expiration date اللى فى الشهاده يا استاذ طارق؟

    ردحذف

ما هو رأيك فى مدونة "هذا ما رأيت فى دبى" ؟