هذا ما رأيت فى دبى فى معرض القاهرة الدولى للكتاب يوم الأربعاء الموافق 23 يناير لعام 2013

بسم الله الرحمن الرحيم 

بفضل الله ومنه ، سيشارك كتاب هذا ما رأيت فى دبى فى معرض القاهرة الدولى للكتاب يوم الأربعاء الموافق 23 يناير لعام 2013 

تم نشر الكتاب بواسطة "نهضة مصر للنشر والتوزيع " ، وطبعا دى غنية عن التعريف 

نهضة مصر للنشر والتوزيع بقالها 75 سنة بتنشر لأفضل المؤلفين فى مصر والعالم العربى والحمد لله ربنا وفقنى ونشرت معاهم بعد ما شافوا نجاح مدونة هذا ما رأيت فى دبى وعدد المتابعين إللى إقترب من ال 60 الف فانز .

معلومة طبية : الناس اللى بتتعب من كلمة نهضة وبيجلها استبحس حراراى ، أحب اقولك واؤكدلك إن دار نهضة مصر للنشر والتوزيع ، ملهاش علاقة خالص بمشروع النهضة ، دا تشابه أسماء ، لكن دى من أب ودى من أب تانى خالص 

.

معلومة صحية : الناس اللى بتحب مشروع النهضة ، نهضة دى ولا مش نهضة يا متعلمين يا بتوع المدارس ؟ 

من الأخر ، عاوز النسخ تتمسح من السوق ، عشان ننزل بالى بعده ، 

الكتاب عبارة عن مجموعة من الاحداث الواقعية إللى مريت بيها فى الغربة فى دبى ، وإللى بيمر بيها أى مغترب فى أى دولة ، هتلاقينى بتكلم عن صعوبات ومواقف كتير قابلتنى وإزاى اتعاملت معاها ، دا غير 

مواقف ناس كتير قابلتهم او اشتغلوا معايا ، إتكلمت من أول المطار واول يوم فى دبى ، وأول يوم فى الشركة ، وبدايه ظهور المشاكل ، وطريقة التعامل معها ، وأحداث كتير ممتعة ومشوقة إن شاء الله .

فى حجات ممكن تلاقوها على المدونة بتاعتى هذا ما رأيت فى دبى ، وفى حاجات مش موجودة ، هتلاقوها بس فى الكتاب .

الكتاب إن شاء الله من يوم 23 يناير هيكون متوفر فى جميع مكتبات أ والديوان والشروق وكذلك جميع منافذ البيع خارج جمهورية مصر العربية 

ولو ملقتهوش فى أى مكتبة قريبه منك ، إتصل على خدمة العملاء بتاعة دار النهضة على رقم 16766 وهما هيشحنوه لحد باب بيتك .

يعنى محدش له حجة خااااااااااااااااااااالص 

الناس إللى هتروح معرض الكتاب إن شاء الله ،

اول توصل ، متبصيش يمين ولا شمال ،إسأل على مكان " نهضة مصر للنشر والتوزيع " وتروح عليهم و تقولهم فين كتاب " هذا ما رأيت فى دبى " ، وإشترى نسخ على قد ما تقدر ، 

اى حد من صحابك بيفكر يسافر إديله نسخة 

صاحبك اللى فى الكلية ، وقرب يخلص إمتحانات ومش عارف هيعمل إيه فى الأجازة ، إديله نسخة

عاوز تهادى خطيبتك فى الفلانتين الجاى ، إديها نسخة 

عاوز تجيب هديه لوالدتك فى عيد الام ، هاتلها نسخة 

زهقت من الأخبار السياسية والفيس بوك ، استهدى بالله كدا وإشترى نسخة وأقرا واتمتع 

إلى كل إمراه وطفل ، إلى كل شاب وفتاه من هنا بقولك وبقولها ، من فجر صباح يوم الاربعاء 32 يناير ،

بعلو صوتك أصرخ ونادى ، هاتولى نسخة ، هاتولى نسخة ، هاتولى نسخة متسكتش الا لما يجبولك نسخة :) 

يا شعب مصر العظيم ، يا شعب أمتنا العربية ، هذا الكتاب أمامكم ، فلتنسفوه نسفاً ، 

لا تراجع ، إلى الأمام ، إلى الامام ، معرض ...معرض ...معرض .